Numri i të shëruarve nga COVID-19 në Maqedoninë e Veriut ka arritur në 10,025 njoftoi Ministria e Shëndetësisë, duke e vlerësuar si të suksesshme punën e institucioneve shëndetësore në luftën kundër koronavirusin të ri.

“Në javët e fundit kemi një rritje të numrit të njerëzve që shërohen nga koronavirusi dhe numri i atyre aktivë është në rënie. Vetëm së bashku mund të parandalojmë përhapjen e virusit. Mbani maskë mbrojtëse, mbani distancën fizike dhe pastroni duart rregullisht. Nuk ka asgjë më të rëndësishme se shëndeti dhe jeta e njeriut”, deklaroi ministri i Shëndetësisë në Qeverinë e Maqedonisë së Veriut, Venko Filipçe.

Sipas raportit të Institutit të Shëndetit Publike, në 24 orët e fundit janë testuar 1,733 kampione dhe prej tyre 159 persona janë diagnostikuar me sëmundjen e rrezikshme. 6 ishin vdekjet e reja. Numri më i madh i të infektuarve është në qytetet e Shkupit, Kumanovës dhe Gostivarit. Sa i përket viktimave; katër janë regjistruar në Shkup të moshës 77, 80, 85 dhe 86 vjeç, një në Gostivar dhe një tjetër në Shtip. Më këto numri i të vdekurve ka arritur në 563, pjesa dërrmuese të të cilave në Shkup. Aktivë janë ende 2,843 persona.